Enti pemacha agi ingat maya keterubah Majalah Pegari dikeluarka suba. Ita mega pemerindang keterubah ngias mua surat Pegari. Serak tu kami nyerungkai kukun pengidup Ita enggau lebih nenak agi. Pementas enggau penyiru Ita nyambut temuai, ukai dichereminka ba kami aja. Ita endang ditemu mentas sereta nelap ati enggau semua orang. Nya alai penatai kami sebuat seruran diiring enggau tuchum ti seruran ngias mua iya ti bajik. Nambahka nya, unggal Mila, laki Ita mega orang ti mereti amat ke pengawa bini iya nyadi pemerindang ti diempu semua peninga
Ita Medin ada kena 4 Januari. Kala besekula di SMK Tatau naka pom lima. Lebuh maya lepa iya rindu macha majalah pegari enggau majalah mingguan wanita. Kelimpah ari nya iya mega rindu macha novel sereta ngemas rumah. Ita Medin udah beruang bilik lalu bisi dua iku anak.Lebuh ke ditanya baka ni keterubah iya nyingkang ke diri ngagai dunya pemerindang dia iya madahka apai iya endang siku orang ke selalu nebah nyawa sereta kala enggau orang bepekit belagu. Apai iya mega landik nebah sape enggau mayuh main asal bukai. Ita Medin mega nemu “beganu” laban kala diasuh bala pengajar beganu maya ke agi sekula suba. Pengerindu iya ke pengawa belagu tu endang bisi ari mit maya iya ke agi besekula. Ita medin kala enggau orang bepekit bintang kecil enggau pekit belagu tebuka ke orang mayuh. Dalam pemayuh pekit ke kala dipasuk iya dia iya madahka diri seruran bulih nombor belama. “Nombor satu nya meh ke suah agi” pia ku iya.
Album keterubah Ita Medin keluar dalam taun 1996 enggau nama “enda ulih sejalai”. Sambut peninga mayuh maya nya chukup manah lalu ngangkatka agi nama Ita setanding enggau bala penanyi ke udah lama tebilang.Ita medin udah 10 taun nyadi pemerindang lalu album iya ti pemadu mayuh dijual naka ke diatu iya nya album “sulu bisi bini lalai”. Keterubah iya ngerikut lagu Ita Medin enggau kompeni LUH Production sampai ke sehari tu.
Naka ke diatu bala anak iya bedau bisi ngembuan pengerindu ke pengawa belagu baka iya empu. Nyangka agi mit meh nya kini. Nya alai empai temu baga. Ita Medin mega bisi ati deka ngembuan salooon kecantikkan ke diri ba taun ke deka datai. Nyadi artis ukai pengawa ke nyamai. Mayuh pait manis udah diasaika Ita Medin. Iya mega enda tinggal ari gossip. Ita Medin kala dipetenah orang suah betukar laki. Mula iya suba gossip nya pedis amat ka ditelan tang lama-lama nyau nyadi pekara biasa. Mayuh macham cherita ti ngasuh Ita Medin tuchum kediri lebuh ngenang sambut bala peminat maya iya ke belagu ngagai menua sida.
Ba Ita Medin Majalah Pegari ulih ngangkatka bala artis kitai bansa ngambika dikelala orang mayuh enggau silik agi. Pandak jaku ku iya MP tu ulih nulung bala artis kitai bansa kelebih agi bala artis ke baru dalam dunya pemerindang. “Ngasai diri siku ari bansa Iban ti udah bisi majalah kediri empu kitai patut temegah ati,” pia ku Ita nampung randau iya . Ita Medin mega madahka mayuh bala pemacha MP enda nemu reti gossip. Mayuh sida pechaya ke utai ti dicheritaka ba sukut nya. Ke penudi iya Ita Medin meri lalau ngagai bala artis ke bukai ngarapka sida liat ati napi penguji. Endang sigi baka dunya pemerindang mayuh penguji lalu kereja pengawa enggau ati ti lurus. Pesan Ita Medin ngagai bala peminat mayuh terima kasih ke sukung bala kita ngelama tu. Iya mega ngarapka bala peminat iya seruran murah jereki.
source:Pegari
No comments:
Post a Comment