Rosiana Urai | Penanyi Sensasi Iban

Biodata Penanyi Sensasi Iban: Rosiana Urai

Urai, penanyi bekulit chelum lis, betubuh mit sereta tinggi tu udah tentu regas ba panggau maya ti merindang. Kati enda pia, tubuh ke baka tu nyamai menselit, ‘linchah’ munyi ku Melayu. Taja pan iya ukai bansa Iban tang iya pandai bejaku Iban, ngembuan alun sada nyawa ti chukup tinggi sereta nyaris tetaing nyemetak didinga. Pengelandik betanda nitihka rentak alun lagu enda milih nya lagu ti ranchak-ranchak, lagu dangdut, tubuh iya ka nyadi memagang.

Penau Urai ukai semina belagu aja tang landik ngajat Kayan, siti ari ‘pemangkin’ ti ulih nyungkakka populariti iya. Nama kebuah enda landik ngajat Kayan, iya ga endang peranak Orang Ulu ari bansa Kayan enggau Kenyah di Long Pelutan, Baram.

Taja nadai bekena ke make-up maya kami ngambi gambar iya, tang umur iya salah kelala baka ke baru manggai 30. Enda sekali kitai nyangka indai beranak tiga tu 37 taun udah pansut ari karung mengada! Mua agi chelum lis lalu pemajik meruan dijaga.

“Bai senang ati belama….dia kitai deka berasai biak belama. Enti kitai ngaga diri tuai, bepekayan tuai, udu tusah ati….dia kitai deka jampat agi tuai.”

Anak ti ketiga ba enam iku diri menyadi, Urai kala besekula ba SRK Long Miri, Baram lalu udah nya iya nyambung pelajar ba SMK Long Lama datai ngagai ikas pom 5.

Apai tuai Urai, Yazid Ismail asal ari menua Perlis lalu ngembuan penemu ba pengawa audio-video. Ukai semina nya, Yazid mega siku komposer musik. Ukai orang ti semina nemu ngelansa pasal dunya musik, tang tuku mensia, pugu orang ke endang bisi penemu ba pekara audio-video. Nya mih, ketegal nasit, dua iku mensia ti bela bisi karrier ke sama, diajihka petara betemu lalu ngikat pengerindu. Pengelama udah begulai, seduai bisi anak tiga iku, ke tuai nya indu, beumur 12 taun. Ke nombor dua nya lelaki beumur 10 taun lalu iya ke pengkuan amat, indu mega, baru beumur 3 taun.

Lagu keterubah Urai direkod urung taun 1995 ti diberi penama “Nama Berita Sulu”. Maya nya mega iya ngena nama penuh iya, Rosiana Urai.

“Album keterubah aku suba enda tentu laku laban maya nya suba aku enda pandai bejaku Iban. Tambah mega chara aku nyebut jaku Iban pan enda tentu betul.”

Ba senentang bayar ke diterima ari siti-siti album Urai terus terang madah nyamai agi dibayar “lump sum” tauka ngena chara bayar sekali renggat aja.

“Enti dibayar nitihka penyampau album ke laku, laku pan album dipadah enda laku mih. Nadai mih guna.”

“Tusah deka madahka diri enda puas ati tang tu mih utai ti nuntung kami artis.”

Ke diatu, Urai seduai laki iya udah ngambi pemutus enggai agi ngikat kontrek enggau kompeni pengerekod lagu laban seduai iya deka nguji nengkebang kediri. Nya mih siti ari pemerani seduai iya. Nadai kebuah enda pia, Yazid nemu ‘shooting’ enggau ngedit video, nemu ngaduka musik kediri empu. Nya alai manah agi ga ngaga kediri lalu enti ulih, sadung kediri empu awakka kitai puas ati enda diempa orang.

Urai rinduka lirik lagu ti disadaka Jeffery Nyaloi. Kelimpah ari nya, Urai rindu ninga sada nyawa Winnie Albert laban kenu ku Urai, Winnie Albert bisi ngembuan vokal ti ‘power’. Kelimpah ari nya iya rindu mega ninga sada nyawa Andrewson Ngalai laban ulih beretan lama ba industri musik kitai Iban taja pan mayuh artis baru.

Sekumbang ke nyadi artis rekoding, Urai semina kala ngerekod lagu ba kompeni TBC iya nya ari taun 1995 nyentuk ngagai taun 2005. Diatu iya udah nadai terikat enggau ni-ni kompeni pengerikod lagu agi. Reti nya iya siku ari penanyi ti ngatika diri.

Urai mega enda enggai ninga jaku orang ke ngumbai raban artis enda tentu idup enti semina ngarapka ari asil jual album. Kebuah pia ku iya, royalti ke diterima enda mayuh. Nya alai mayuh agi bala artis ngarapka kangau belagu ba pengerami tauka sebelah ‘fun-fair’.

“Ni enda ngarapka kangau kena ngulihka duit dih, royalti ke diterima enda setipak enggau pengelaku album.”

Urai meri tabi puji ngagai Ernesto Kalum (BHMP) ti udah berani mantaika konsep baru dalam industri musik kitai Iban. Ba bala artis ti agi bisi kontrak enggau kompeni, ka pedis-pedis ga sida iya ngaga ubah nengkebang lagu enggau versi tauka alun ke baru laban lagu ti deka dibai nya endang udah dipilih kompeni.